Ekainaren 8an, astelehena, 10:30-14:00 bitartean, Ozeanoen Mundu Egunaren testuinguruan, Plentziako Itsas Estazioak (PiE-EHU) Kontuz! Ez nazazu zapaldu! proiektuaren ekitaldi nagusia egingo du Bizkaia Aretoko Mitxelena aretoan. Euskal Kostaldeko Ezagutzaren jardunaldi honetan urte osoan zehar egindako lanak eta lorpenak zabalduko dituzte parte-hartzaileek, kongresu-formatuan. Aurkezpenez gain, Cimasub-eko (Donostiako Nazioarteko Urpeko Zinemaldiko) film laburrak ikusi ahalko dira, eta dibultazio-hitzaldi bat egongo da. Aurtengo edizioan, Laura Nuñez Pons, Stazione Zoologica Anton Dohrn, Napoliko ikertzaileak eskainiko du mintzaldia. Ekitaldia sari-banaketarekin amaituko da. Era berean, 12:30etik aurrera, proiektuan parte hartu duten Lantegi Batuak, Gaude, Luisa de Marillac, Argia eta APNABI taldeek beren txokoak izango dituzte urteko lana eta esperientziak ezagutarazteko. Horrez gain, hainbat tailer eskainiko dira: Begisarek ikusmen-urritasuna dutenen errealitatea gerturatuko du; Estudio Melangek plastikozko poltsen birziklapena eta termofusio-teknika erakutsiko ditu; Tantak GKEak Kantauri itsasoko biodibertsitatea izango du hizpide; eta Lucia Revueltak moda jasangarriaren inguruko ekimen ekintzailea aurkeztuko du. Azkenik, ekainaren 9tik 17ra bitartean, Bizkaia Aretoko Chillida Aretoan gizarte osoari zabaldutako erakusketa egongo da ikusgai Euskal Herriko hondartzetan dagoen biodibertsitate mikroskopikoa eta mikroplastikoak ezagutarazteko. Bertan, Kontuz! Ez nazazu zapaldu! proiektu inklusiboan herritar-zientzialariek egindako poster zientifikoak, maketak, jolasak, euskarriak, eta mila sorpresa ikusi ahal izango dira. . Gainera, aurtengo erakusketa berrikuntza berezi batekin dator: bisitariek galdetegi labur bati erantzunez hainbat sari irabazteko zozketan sartuko dira. Beraz ekainaren 9tik 17ra Bizkaia Aretora hurbiltzera gonbidatzen ditugu herritarrak, itsasoko biodibertsitatea modu erakargarri, inklusibo eta parte-hartzailean ezagutzeko. Sarrera librea da. EGITARAUA 10:30-11:00: Taldeen izen-ematea. Bizkaia Aretoa 11:00-11:10: Ongi etorria 11:10-11:20: CIMASUB-en film laburren proiekzioa 11:20-11:50: Laura Nuñez Pons– Staziona Zoologica Anton Dohrn, Napoli – ikertzaile gonbidatuaren dibulgazio-hitzaldia 11:50-12:00:CIMASUB-en film laburren proiekzioa 12:00-12:30: Ordezkari akademikoen agurra eta sari-banaketa 12:30-14:00: Tailerrak eta poster erakusketara bisita. Ekitaldia streaming bitartez jarraitu daiteke esteka honetan. Ozeanoen Mundu Eguna G9EU4RESEARCH proiektuaren barruko aurre-ekitaldi bat da. Europar Batasunak finantzatzen du ekimen hori, Horizonte Europa programaren barruan: Ikerketaren eta Berrikuntzaren Esparru Programa, 101305392 zenbakiko diru-laguntzaren bidez. “Kontuz! Ez nazazu zapaldu!” proiektua Zientzia, Berrikuntza eta Unibertsitate Ministerioko Zientzia eta Teknologiarako Fundazioaren lankidetzari esker gauzatu da (FECYT-MICIU). Era berean, EHUko Ikerketa Gizartean Zabaltzeko Zuzendaritzak zein EHUko barne deialdietako funtsek eta ikerketa talde zientifikoek ere diruz lagundu dute. Informazio gehiago Ikertzaileen Europako Gauaren eta Kontuz! Ez nazazu zapaldu! proiektuen web orrietan.      

✔Elhuyar Zientzia hedabide digitalak eguzki-eklipseaz gozatzeko edukia jarri du gizartearen eskura ✔Fenomeno astronomikoaren gakoak hainbat formatutan daude eskuragarri: bideoak, audioak, elkarrizketak, hitzaldia... 2026ko abuztuaren 12ko eguzki-eklipsea azken urteotako gertaera astronomiko garrantzitsuenetako bat izango da: azken 100 urteetan Euskal Herrian ikusgai izango den eguzki-eklipse oso bakarra. Artikotik eta Groenlandiatik barrena etorriko den eklipsea da; mendebaldean hasi, eta ekialderantz urrunduko da. Elhuyar Zientzia hedabide digitalak, gertaeraren garrantziaz jakitun, eduki-sorta aberatsa jarri du gizartearen eskura: “Eklipse-tantak” audio-pilulak, idatzizko baliabideak, ikus-entzunezkoak eta beste hainbat eduki daude berariaz sortutako banda monografiko batean. Besteak beste, Elhuyar aldizkariaren ekaineko zenbakiak eguzki-eklipseari monografiko bat eskainiko dio. Erreportajeen bidez, eguzki-eklipseen alderdi zientifikoaren, bizidunongan sortzen duen eraginaren eta Eguzkiari berari buruzko azken ikerketen berri emango du Elhuyar aldizkariak, baita paperean ere. Horretaz gain, harpidedun berriek eklipsea ikusteko betaurrekoak jasoko dituzte opari. Baliabideak gehituz joango da modu dinamikoan abuztura bitarte; esate baterako, Euskadi Irratiko Norteko Ferrokarrilaren eta Euskal Telebistako Teknopolis saioaren programa bereziak gehituko dira. Horiek guztiak banda monografikoan egongo dira ikusgai.   Norteko Ferrokarrila irratsaioa Norteko Ferrokarrila irratsaioan, Euskadi Irratian, eklipseari buruzko programa bat emitituko da zenbait astronomorekin. Denboraldiaren bukaeran izango da, ekainaren 26an, eta, bereziki abuztuan izango den eguzki-eklipse osoaz hitz egingo den arren, fenomenoa bera aztertuko dute zientziaren ikuspuntutik. Teknopolis telebista saioa Ekainaren 20ko asteburuan, denboraldi honetako azken saioa abuztuaren 12ko eklipseari eskainiko diote. Fenomeno astronomiko horren atzean dagoen zientziaz hitz egingo dute, eta bat-batean iluntzeak agerian utz ditzakeen sekretu kosmikoez arituko dira. Izan ere, eklipse bat momentu paregabea da eguzkiaren inguruko ikerketa egiteko, edo aurretik egindako ikerketak baliozkotzeko. Tailerrak eta hitzaldiak Aurrez aipatutako baliabideez gain, Elhuyarrek gazteentzako tailerrak eta helduentzako hitzaldiak prestatu ditu, fenomenoak gizartean sortzen duen interesari erantzuteko. Alde batetik, eklipsea ulertzeko, modu seguruan ikusteko eta zientziarekiko jakin-mina pizteko tailerrak izango dira. Eta, bestetik, “Eklipsea, zorioneko itzala” dibulgazio-hitzaldian, eklipsearen ikusgarritasunaz gain, gertaerak zer inplikazio dituen azalduko da, bai historikoa, baita zientifikoa ere.

Logos Elkartea zientziaren dibulgaziorako elkartearen "Zientziaz blai" lana saritu dute kultura zientifikoa modu berritzaile eta eraldatzailean Bilboko auzo ahulenetara eta ezagutza zientifikoa eskuratzeko zailtasun handienetara hurbiltzeagatik. Eider Inuntziaga Bilboko Udaleko Euskarako, Herritarren Arreta eta Partaidetzako, 2030 Agendako eta Nazioarteko Gaietako zinegotziak VIII. Bilbao Balioen Hiria Sariak banatu ditu gaur arratsaldean Udaletxeko Arabiar aretoan. Eremu desberdinetako hiru erakundek Bilboko Balioen Agirian jasotako balioak bultzatzeko egindako lana aintzatesten dute sariok: Euskrania elkarteak, San Luis Ikastetxeak eta Logos Zentroak.Aurtengo edizioaren berritasun gisa, Bilboko Udalak Bilbao Balioen Hiria - Fundación Robert F. Kennedy Spain sarien deialdian ere parte hartu du. Ekimen horren helburua da gazteek giza eskubideekiko daukaten konpromisoa sustatzea, ikusaraztea eta aitortzea, eta Kamanga Influencers Club-en "Nacemos donde queramos" ikus-entzunezko lana saritu du. Guztira, 48 proiektu aurkeztu dira aurtengo lehiaketara. Lehiaketaren helburua da Bilboko Balioen Agirian jasotako balioak sustatzen dituzten eta auzo, barruti edo hiri mailan gauzatu diren edo gauzatzen ari diren ekimenak jendaurrean aitortzea. Aurkeztutako 48 proposamenak hiru motatakoak izan dira: 36 irabazi-asmorik gabeko elkarte eta erakundeek egindakoak, 9 ikastetxeek egindakoak eta 3 enpresek, saltokiek, ostalaritzak, elkargo profesionalek edo antzeko erakundeek egindakoak, guztiak ere Bilbokoak. Eider Inuntziaga Euskarako, Arreta eta Herritarren Partaidetzako, 2030 Agendako eta Nazioarteko Gaietako zinegotzia izan da ekitaldiaren buru eta azpimarratu du "balioek iparrorratza eta Bilboko itsasargia izaten jarraitzea" dela helburua. "Lehiaketa honek aukera ematen digu gure hiriko balioak zundatzea, eta adierazle guztiek erakusten digute norabide onean goazela, jakina, printzipioekin konprometituta dauden eta printzipioetan irmo dauden herritarrei, bilbotarrei, esker". "ZIENTZIAZ BLAI", ZIENTZIAREN DIBULGAZIORAKO LOGOS ELKARTEA Zientzia-dibulgazioko proiektua da eta kultura zientifikoa hurbiltzen du zaurgarritasun sozioekonomiko handiagoa duten eta ezagutza zientifikoa eskuratzeko zailtasun handienak dituzten Bilboko auzoetara. Ekimenak herritar guztiei eta ikastetxeetako ikasleei zuzendutako dibulgazio-jarduerak egiten ditu eta, gainera, emakume zientzialariak ikusaraztea eta zientziaren, gizartearen eta lurraldearen arteko lotura sustatzen du. Epaimahaiak proiektu horri eman dio saria ezagutza zientifikoa herritarrei ikuspegi inklusibo, komunitario eta belaunaldiarteko batetik hurbiltzeko duen gaitasunagatik. Bereziki nabarmentzekoa da San Frantzisko, Bilbo Zaharra eta Zabala auzoetan egindako lana, kultura zientifikorako sarbide paritarioa sustatzea eta dibulgazioa gizarte-kohesiorako eta komunitate-ahalduntzerako tresna gisa erabiltzea. Era berean, epaimahaiak oso modu positiboan baloratu du ikastetxeekin, auzo-elkarteekin, kultura-eragileekin eta zientzia-erakundeekin lankidetzan aritzea, bai eta genero-ikuspegia zeharka txertatzea ere, emakumeak zientzian.